En Galicia chamámoslles fragas ás zonas de bosque espeso, ao interior das calses a luz sempre chega velada polas árbores. Desta forma, no seu interior perdura a humidade, a frescura, a temperatura case constante e, sobre todo, a vida.

Cobra a vida na fraga miles de formas diferentes, cada unha delas peza imprescindible dun ecosistema tan fráxil como pertinaz e lonxevo. E así, desde sempre, atopamos estes lugares proclives á maxia e ao misterio, á meditación e ás lendas. E integrámolos na nosa cultura .

As Fragas do Eume son un lugar extraordinario. Son as fragas costeiras mellor conservadas de Europa, e un dos escasísimos bosques do seu tipo do continente. Albergan numerosas especies animais e vexetais ameazadas, algunhas relictas, así como os ecos dunha extraordinaria historia que toma singular brío na época medieval.

Benvidos ao Parque Natural Fragas do Eume.